“digital шигырь”гә багышлап

Чыгарылыш көнгә шигыремнең
Сүзләренне өйдә калдырдым.
Аны эзләп табу ниятендә
Челтәр киңлекләрен актардым.

Кинәт кенә, бармагым астында
Бер сәхифә төште күземә.
Озак уйламыйча, нәтиҗәдә,
Карар кылдым анда керергә.

Керсәм, нәрсә күрим – бөтен нәрсә
Минем туган, татар телендә.
Матур хәрефләр белән язылган
Балкып тора анда шигырьләр.

Үземнең шәхесемне теркәгәч,
Сәхифәне башлыйм карарга...
Белмим, күргәнем бармы Челтәрдә
Тагын шома, туры, анардан.

Ярый бастырырга үз шигырьне,
Башкаларын ярый укырга...
Үзем шаккатам шул сәхифәгә,
Әллә ялгыш, әллә могҗиза...


Бу шигырь белән “Digital шигырь” сәхифәсен ясаучыларга зур рәхмәт әйтергә телим