Саумы?

Кемдер әйтер:
— Онытырсың әле...
Төп-тамыры калмас хәтернең.

Җил кабатлар:
— Күнегерсең әле.
Бер тасмадай үтер көннәрең.

Онытылмый,
бары вакытлыча,
чәрдәкләнгән хәтер туктала.
Юккамени — без капчыкта ятмый! —
дип, олылар сүзне куерта.

Өйрәнәбез бертөрле тәртипкә,
күнегәбез гореф-гадәткә;
сердәшеңнән хәбәр килми торса
сөрлегәсең
мәҗбүри мәрткә.

Әмма беркөн,
тәрәзәңне чиртеп,
килеп керер мәңге яшь Хәят.
— Сагындыңмы?
Хәтсез күрешмәдек.
Сау гынамы.
Саумы?
— Ниһаять!..

Алсу Галеева, 19.01.2026