Мөһәндисләр сызымы

Тормыш диңгезен әлләни
Артык-мортык ишмәгәч,
Һәр дәресне гел кабатлау
Гадәтен бик измәгәч,
Саный алам яшь балага
Әлегә үз-үземне,
Җыерчык түгел битемдә —
Мөһәндисләр сызымы.

Нәтиҗәнең, бик иртәләп,
Ничек килгәнен белдем.
Борынгылар әйткән сүзнең
Өресенә төшендем.
Авыз ерып елмаерга
Мин иләсләрдән түгел.
Каш арасында буразна
Уйчан булганга бүген.

Ә шулай да, садә күңел,
Шатланам яңалыкка,
Мин ил карчыгы түгел лә,
Түгел авыз җил-капка.
Һәр кешегә ачылыплар
Түгелергә дә тормыйм,
Кызык-мызык тамашага
Җыелганга кызыкмыйм.

Каралама бирелмәгән,
Ялгышлыклар да чыга,
Хайван затыннан яралган,
Арттан гел чәйнәп тора.
Сокланам якты йөзләргә,
Сокланам җылы сүзгә.
Кием алмашкандай холык
Төрләнәмесоң сездә?..
06.03.2026
АЛСУ ГАЛЕЕВА